Isolezwe的2023-08-04目录

IZINGANE ZES’THEMBU 1Magic (103) NgoMgqibelo ngo-8 ebusuku UKUNGABONI ngaso linye okwenzeka ephathini kukaLwandle, kuyaqhubeka. Izelamani zakaMseleku zizama ukulungisa ukushayisana kwemibono nokuqophisana ngamazwi kwazo ngesikhathi zigubha usuku lokuzalwa kukaLwandle. UMseleku noMpumelelo bavakashela uMaYeni, ukuze bamazise ngengane ezayo, bazame nokuphendula imibuzo yakhe ngentombi ekhulelwe. SUNDAY SEXY LOVE Mzansi Magic (161) NgeSonto ngo-9 ebusuku INTOKAZI ezakhele igama ohlelweni iThe Real Housewives of Durban uNonku Williams, izobonakala nobeyisoka layo uRough Diamond. Bazoxoxa ngohambo lwabo kwezothando ngemuva kokuthi uNonku ehlale isikhathi eside engayi ocansini.…

Izolo lezi zinhlangano ziveze ukuthi isigcawu sokucobelelana ngamaqhinga sizoholwa nguSolwazi William Gumede, waseNyuvesi iWitwatersrand, ozolekelelana nabanye ongoti. Amaqembu ayingxenye yengxoxo iDA, IFP, ActionSA, FF Plus namanye amancane. Kuhlelwe ukuthi izingxoxo zibe ngo-Agasti 17 -18 eKempton Park, lapho bezozama ukufinyelela esivumelwananeni sokusebenzisana. Izolo amaqembu amemezele ukuqokwa kukaGumede esitatimendeni asikhiphe ngokubambisana. Kumanje uGumede ucija amalungu ephalamende asemazweni angaphansi kweCommonwealth, ekutheni akwazi ukuqapha ukusebenza kohulumeni basemazweni abo. Ubuye afundise amalungu amaphalamende ukwenza izabelomali. UGumede waziwa kakhulu ngokuxazulula izimpi emazweni ahlukene. Muva nje, ujutshwe ukuba axazulule imibhikisho eqhubeka eSwatini. UGumede useqalile ukwenza umsebenzi wakhe wokuhola izingxoxo. “Useqalile ukuhola imihlangano yamasonto wonke yamaqembu ayingxenye yesivumelwano. Kule mihlangano sixoxa ngokuzodingidwa esigcawini esizayo. Le mihlangano iyasiza ekutheni izinto eziningi sisheshe sivumelane ngazo ngaphambi kwesigcawu. Imisebenzi kaGumede isiqalile ukuthela izithelo ezinhle. “Inhloso yethu ukuqhamuka nezisombululo ezinkingeni ezikhungethe izwe…

Ngesikhathi kunembizo ehlelwe yisifundazwe yokuqwashisa ngobugebengu ebisezinkundleni zemidlalo eThembeni ngeSonto eledlule, kuvele izikhalo kwabamele abafundi kulesi sikole kukhalwa ngezinkinga ezikhona kuso eziphazamisa uhlelo lokufunda nokufundisa. Njengengxenye yomkhankaso wokuvakashela izikole, iMeya kuMasipala iLembe uMnuz Thobani Shandu, ivakashele kulesi sikole ngoLwesibili, izokhuluma nabafundi ngalezi zigameko eseziqubule ukwesaba phakathi kwabo. UShandu ubehambisana namaphoyisa, izikhulu zoMnyango wezeMfundo esifundeni iLembe, aboMnyango wezokuHlunyeleliswa kweziMilo, abophiko lokuPhepha koMphakathi nezikhulu zoMnyango wezeMpilo nabophiko olubhekele ukuthuthukiswa kwentsha kulo masipala. Ugcizelele ukubaluleka kokusebenza ngokubambisana kweminyango kahulumeni ukubhekana nesihlava esihlukumeza abafundi. “Lokhu kuyigxathu elibalulekile ekuqinisekiseni ukuthi ukufunda kuqhubeka kahle. Inhloso enkulu ukuqhamuka namasu azosebenza kahle ukubhekana ngqo nalezi zinkinga eziphazamisa ukuphuculwa kwemfundo,” kusho yena. Kwenzeka lokhu nje, ngeledlule kuphazamiseke ukufunda esikoleni eMaqongqo High, eMkhambathini njengoba kuthiwa kube nengxabano yabafundi okusolakala ukuthi idalwe ukusetshenziswa kwezidakamizwa ngabanye babafundi kulesi sikole. Kuthiwa abafundi bebephethe…

Lokhu kusho ukuthi ngokwale migomo, amaqembu kuzodingeka ukuthi akhokhe uR300 000. Abangenela ukhetho ngokuzimela kuphakanyiswe ukuthi bakhokhe uR20 000 ukungenela ukhetho kuzwelonke, kuthi ezifundazweni bakhokhe uR15 000. Lena ngenye yemigomo evulelwe ukuthi umphakathi uphawule ngayo ngaphansi komthetho wezokhetho kuleli. Okhulumela ikhomishini, uNkk Kate Bapela, uthe imali yokungenela ukhetho emaqenjini izosuka kuR200 000 iye kuR300 000 ngokwemigomo emisha. Uthe umphakathi unikwe kuze kube u-Agasti 27 kulo nyaka ukuthi uphawule ngayo. Kuzokhumbuleka ukuthi uma iqembu noma ongenela ukhetho ngokuzimela ekhala ngaphansi okhethweni, engatholi ngisho isihlalo esisodwa, imali iyagqwamba ayibuyeli emuva. “Iqembu uma lifuna ukungenela ukhetho esifundazweni esisodwa kuphakanyiswe ukuthi likhokhe uR45 000. Uma lifuna ukungenela ukhetho kuzwelonke kulindeleke ukuthi likhokhe uR300 000, ngokwe-migomo emisha,” kusho uNkk Bapela. Uthe kuyaqala ukuthi kunyuswe imali yokungenela ukhetho kusuka ngo-2014. Phambilini ikhomishini yakuveza ukuthi inhloso yokukhokhisa…

BIG MOMMA’S HOUSE e.tv (194) NgoMgqibelo ngo-8 ebusuku OMUNYE wamaphoyisa ophiko lweFBI, ukhetha ukuzishintsha abe ngowesifazane osekhulile ukuze avikele ufakazi wombuso njengoba kukhona icala elibi afunelwa lona. Akagcini nje ngokuvikela yena yedwa kodwa uvikela nendodana yakhe. UMartin Lawrence ulingisa kule filimu. PUSS IN BOOT M-Net Movies 1(104) NgeSonto ngo-6.45 ntambama NGEMUVA kokuthi aze ahlangane noDonkey noShrek, uPuss wayesekwazi okuningi futhi eseyiqhawe kwabaningi. Njengoba enoKitty Softpaws eceleni kwakhe, usezinhlelweni zokuthi athole ubhontshisi wemilingo owebiwe.…

NTOKAZI esingene yathi shi kwezokulingisa, uMapule Ngobese edume ngeleNdlovukazi Mapule, ithi isihlava sokuhlukunyezwa kwabesifazane yisona esiyenze yenza umdlalo weshashalazi oqondiswe wuMbongeni Ngema ozoqala ukukhonjiswa ngale nyanga yabesifazane. UMapule ukusho lokhu njengoba lomdlalo othi Omama Abahlobisi Bomhlaba, uzoqala ukukhonjiswa ePlayhouse, eThekwini, kusuka ngo-Agasti 10 kuya ku-Agasti 13. Uthe unethemba lokuthi ngelinye ilanga uzoba yifilimu egqugquzela ukuthi kusukunyelwe ukuhlukunyezwa kwabesifazane. Kuwona, abesifazane bazoxoxa izindaba ezehlukene zokuhlukunyezwa abakuthola emshadweni, ebudlelwaneni bezothando, emsebenzini ngisho emindenini abazalwa kuyo. “Ukuzibona la sikhona manje kusho lukhulu futhi sibheke ekutheni manje siwenze ifilimu lo mdlalo. Kuwona sixoxa izindaba ezehlukene ezithinta abesifazane. Okujabulisa nakakhulu ngawo wukuthi siwenze ngenyanga yabesifazane ngoba sifuna ulethe umyalezo ojulile kubantu abaningi. “Sisebenze nabesifazane abenza ubuhlalu, abadayisa amaphinifa, izinkamba namacansi emigwaqweni yeTheku. Kahle kahle ngangihlose ukubhala incwadi kodwa kula ngithole okuningi nakubo abahlukumezile, sabathatha sabafaka…

UPHAKAME umoya kufakazi woMbuso owabe engumngani kaSenzo Meyiwa owayengunozinti weBafana Bafana ongasekho, ngesikhathi ummeli womunye wabamangalelwa emvalela ekhoneni, ethi akekho muntu owabangenela endlini wabulala uMeyiwa. UMnuz Mthokozisi Thwala, osebhokisini lofakazi njengoba ukuqulwa kwecala kuqhubeka, ubufakazi bakhe nobofakazi ababesendlini kubo kanina wengane yakhe, uKelly Khumalo eVoloorus buthi kwangena abasolwa ababili babaphuca amaselula, badubula noMeyiwa ngo-Okthoba 26, 2014. Bese kuyizikhathi zantambama ngesikhathi uThwala obezwakala ukuthi usethukuthele, ethi uma kuzolokhu kuphikelelwa nokuthi uMeyiwa wadutshulwa womunye walabo ayevele ekade ehleli nabo, kusobala ukuthi kusazothatha eminye iminyaka eyisishiyagalolunye ukuthi kutholakale ubulungiswa. Ukusho lokhu ngesikhathi ephekwa ngemibuzo u-Advocate Zithulele Nxumalo ongummeli kammangalelwa wesine, uMnuz Mthokoziseni Maphisa. UNxumalo uthe: “Ngifuna ukukutshela ukuthi uMeyiwa wadutshulwa ngumuntu owayenaye endlini.” UThwala uphendule ngelithi: “Uma usho njalo, kusobala ukuthi sisazophinde sihlale eminye iminyaka eyisishiyagalolunye lapha. Ngoba phela ngiyachaza ukuthi kwangena abantu.”…

MHLELI: Ngicela abaholi nomphakathi waseMakhosini balungise indaba yabantu abahamba behlukumeza abanye. Baqala babhidliza indlu yomuntu emini kwabha, basuka lapho bayosika izigxobo zokubiya ekubeni umuntu wayesefake ngisho ucingo lwakhe. Ucingo lwasala lulele phansi. Manje sebekhiphe bathatha izigxobo zomuntu, bagqiba isiza sakhe, bafaka ihlabathi nezihlahla. Yonke le nto bayenza emini. Kusho ukuthi kukhona abakwethembile. Ngike ngezwa omunye ekhuluma nabo, ebacela ukuthi abakhokhele umnikazi wendawo. Inkantolo yaseBabanango iyabazi bona. Uma le ndaba ingalungiswa kukhona ubunzima obuzolandela ngoba omunye ozibiza ngomholi wabo uthi uyinduna yakwaNtombela, wakhethwa yiSilo ukuthi aphathe KwaNobamba. Nangu umuntu exova isizwe sikaBayede! Okhathazekile EMAHLABATHINI…

ENyuvesi yaseZululand, oNgoye, kumiswe ukufunda izolo nanamhlanje ukuze kulungiswe izinkinga zesikhwama sezitshudeni, iNSFAS. Umyalezo okhishelwe yizitshudeni ezinkundleni zokuxhumana oNgoye, uveze ukuthi emva kwezingxoxo nomkhandlu wezitshudeni, inyuvesi inqume ukumisa ukufunda ngoLwesine nangoLwesihlanu, ukuze izitshudeni ezingakayitholi imihlomulo yazo kwiNSFAS zikwazi ukuyohlwaya usizo. Uthe lezi zitshudeni zizothola ithuba lokuthi zixhumane nehhovisi elibhekele lesi sikhwama. “Izitshudeni zingakwazi ukuthola ukuthi zilutholile uxhaso ngokuvakashela isizindalwazi seNSFAS. Zingaya nakulabo abamele i-eZaga enyuvesi ukuyothola usizo kulezi zinsuku,” kusho umyalezo wenyuvesi. Okhulumela inhlangano emele imikhandlu yezitshudeni emanyuvesi i-South African Union of Students’ (SAUS) u-Asive Dlanjwa, uthe izitshudeni ziyaveva ngenxa yokuthi ezinye zazo ziphucwe uxhaso ekubeni phambilini zazixhasiwe. Uthe nohlelo olusha lokukhokhela izitshudeni ngqo kuma-akhawunti asemabhange lunezinkinga. “Sizwile ukuthi izitshudeni ezibalelwa ku-10 000 ebeziphucwe uxhaso yiNSFAS seziphinde zaxhaswa. Kuyacaca ukuthi lesi sikhwama senze iphutha sase silungisa leyo nkinga.” Uthe bayayeseka…

Ezweni jikelele bawu-231 obhejane ababulewe kanti bawu 42 ababulewe eKruger National Park, bese beba wu-46 ababulewe eziqiwini ezizimele. UNgqongqoshe wezamaHlathi, ukuDoba neMvelo, uNkk Barbara Creecy, uthe obhejane bahlale besengcupheni yokubulawa ngenxa yezimpondo zabo ezifunwa ngabathile. Uthe basebenzisana namaphoyisa kahulumeni, awezemvelo nezinye izinhlaka zomthetho kuleli nakwamanye amazwe. “Sisebenzisana nezinhlaka ezihlukene ukulwa nokubulawa kobhejane ngenxa yezimpondo zabo. Sinohlelo olucacile lokuvikela izilwane zasendle nokulwa nezigebengu ezihweba ngezilwane zasendle nemvelo yethu,” kuchaza uNkk Creecy. Uveze ukuthi ezinyangeni eziyisithupha selokhu kuqale unyaka amaphoyisa nophiko lwezokushushisa asebophe abantu abawu-31 base bagwetshwa. Omunye wabo ugwetshwe iminyaka ewu-132 ejele. Ungqongqoshe uthe ngeshwa obhejane bayaqhubeka nokubulawa KwaZulu-Natal, ikakhulu eHluhluwe iMfolozi. “Sibeke eceleni uR40 million wokubiya kahle umngcele eHluhluwe iMfolozi, okuyiyona izigebengu ezibulala obhejane ezivamise ukuya kuyo. Uphiko lwezokushushisa KwaZulu-Natal, selubeke umshushisi obhekelele amacala okubulawa kobhejane, athathelwa phezulu. Siyaqhubeka nokubavikela,”…

UKAPUTENI we-Orlando Pirates, u-Innocent Maela, ukholwa wukuthi ukuyokwenzela amalungiselelo okuqala kwesizini, eSpain, kube nomthelela ekutheni abadlali abasha basheshe ukubamba isitayela seqembu. EzikaMagebhula zihlale amasonto amabili eSpain. Zibuye zingashaywanga nakowodwa umdlalo emalungiselelweni azo. UMaela akawuvali umlomo ngebhola elidlalwe ngabadlali abasha. Ngaphambi kokuqala kwesizini iqembu lakhe lisayinise uMelusi Buthelezi obevimba kwiTS Galaxy, Patrick Maswanganyi obekwiSuperSport United, Sephephelo Balani obedlala kwiCape Town All Stars, Katlego Otladisa obesemabhukwini eMarumo Gallants, Lesedi Kapinga obekwiMamelodi Sundowns noKarim Kimvidi waseDRC obegijima kwiMaritzburg United. UMaela oyibamba emuva ohlangothini lwesinxele, uveze ukuthi eSpain basizwe ukuthi bebehlala bebamba izithangami zokukhuthazana. "Ukuphuma eNingizimu Afrika kusisize kakhulu ekwazaneni kahle nabadlali abasha. Ngingakusho ngingananazi ukuthi bangene khaxa esitayeleni esifunwa umqeqeshi uJose Riveiro. Okunye ukuthi sebejwayelene nabadlali abadala. Lokhu kuzolisiza kakhulu iqembu uma selidlala. Sinethemba futhi siyakholelwa kubona. Uma benenkinga bavumelekile ukuya kumqeqeshi…

UMnuz Nkosenhle Madlala usho lokhu emva kokuthi inkantolo igwebe udilikajele uMnuz Mxolisi Gcabashe (33) ngecala lokubulala owayeyikhansela kuMasipala weTheku, uMnuz Minenhle Mkhize (39). UMkhize wabulawa ehlezi evenini yakhe ayesanda kuyipaka egcekeni kubo eCliffdale, eThekwini, ngoJanuwari 2022. Wayekade enezinyanga ezimbili ekhethelwe esikhundleni sobukhansela ku-ward 103. “Into esiphatha kabi kakhulu wukuthi ukubulawa kwekhansela uMKhize, obekade engumuntu omusha, kuyabadangalisa abanye abantu abasha ukuthi bazibandakanye nezinto ezithinta ipolitiki,” kusho uMadlala. UMadlala uthe isikhathi samanje sidinga intsha ukuthi isondele, ithathe imizabalazo yemiphakathi yayo iyiyise phambili. Uqhube wathi intsha yiyona engabaholi bemiphakathi bakusasa ngakho ukubulawa kukaMkhize kuzobathena amandla. Lo mholi uthe kunesibophezelo ababekade besenzile emndenini wakaMkhize owashona engaqedile ukwakha. “Indlu ayeyiqalile (uMkhize), eyakhela umama (wakhe), sizoyiqedela. Sike saba nezinkinga lapha nalaphaya ngenxa yezinto ezithize kodwa siyathembisa ukuthi sizoyiqedela,” kusho uMadlala. Uphiko olushushisa amacala omphakathi, iNational Prosecuting…

MHLELI: Sekukaningi ngizwa abahlaziyi emsakazweni uKhozi FM besekela into obonayo ukuthi kwayona nje iyodwa iwubandlululo. Awukho umlando ogcinwe yisiqubulo esithi “kill the Boers, kill the farmers”. Uma nabo sebecula iculo elisethula isithunzi ngelinye ilanga, siyoqala sikhale kakhulu. Ngizwile ethi bayathanda ukukhala, bayefana nje nathi. Senza sengathi into embi kumele izwiwe yithi kuphela. Bese sibacabangela laba bezinye izizwe ukuthi kumele ngabe baphatheka kanjani. Ukuthi ucule iculo kwangafa muntu wukukhohlisa abantu nje ngoba bayabulawa abalimi, bayangenelwa ezindlini abelungu babulawe. Koze kufe abantu ukuze nibone ukuthi abukho ubulungiswa kule nto? Kukhulunywa ngokubuyisana, uzobuyisana kanjani nomuntu onamagqubu? Asiyekeni amagqubu uma sifuna ukubuyisana sakhe izwe labantu abangenanzondo nobandlululo. Izinkantolo eziningi ziqhatha abantu, umuntu okhipha isinqumo enkantolo ngumuntu ofana nami nawe, uyalenza iphutha. Akusho ukuthi uma ubulale umuntu inkantolo yakuthola ungenacala, sekumele-ke uhambe ubulala abantu. Usuyohambe…

Uphenyo lweSIU oluzobheka ukuqokwa kwezinkampani ezinikwa imisebenzi, lugunyazwe uMengameli Cyril Ramaphosa. Ngokusho kokhulumela iSIU, uMnuz Kaizer Kganyago, uphenyo lwabo luzobheka ukuqokwa kwezinkampani ebezilekelela uhulumeni wesifundazwe ezinhlelweni zentuthuko njenge-Operation Sukuma Sakhe neLuwamba Wellness Center. I-SIU izophenya izinsolo zenkohlakalo ezisukela ku-2007. Ondunankulu abaphathe ngalesi sikhathi nguMnuz Sibusiso Ndebele, Dkt Zweli Mkhize, oMnuz Senzo Mchunu, Willies Mchunu, Sihle Zikalala, njengoba sekuphethe uNkk Nomusa Dube-Ncube. UKganyago uthe bazobheka ukuthi akubanga khona yini ukuphulwa kwemithetho ngesikhathi kuqokwa izinkampani. “Uphenyo luzobheka ukuthi abubanga yini khona ubudedengu obaholela ekumoshweni kwemali. Sinawo amandla okuphoqa abahlomula ngendlela engekho emthethweni ukuba bakhokhe.” Amaqembu aphikisayo esiShayamthetho saKwaZulu-Natal athe kade ayekhala ngenkohlakalo eqhubeka ehhovisi likandunankulu wesifundazwe. USotswebhu we-IFP esiShayamthetho, uMnuz Blessed Gwala, uthe banethemba lokuthi uphenyo luzoveza obala izinto abahlezi bekhala ngazo. “Akuzange kusethuse ukuthi kujutshwe iSIU ukuba iphenye izenzo zenkohlakalo ehhovisi…

USOLA abantu abangaphandle ngokuzama ukudala uqhekeko eqenjini umgadli weqembu lesizwe labesifazane uThembi Kgatlana. Lokhu kwenzeka ngemuva kokuthi iqembu liqophe umlando lifinyelela kwiLast 16 yeFifa Women’s World Cup. IBanyana ishaye i-Italy ngo 3-2 ngoLwesithathu, yaqeda endaweni yesibili kuGroup G ngamaphuzu amane. Ibiqala ngqa ukunqoba umdlalo eNdebeni yoMhlaba. Phezu kwempumelelo kube namahlebezi okuthi kunokushayisana ngaphakathi eqenjini ngenxa yokuthi kunabadlali abangalitholi ithuba lokudlala. UKgatlana, obengukaputeni ngesikhathi libhekene ne-Italy ngenxa yokuthi uRefiloe Jane usalulama, uthe le mibiko ingamampunge. “Lokho kushiwo ngabantu abazama ukuphazamisa iqembu. Kuyishwa ukuthi abantu abangaphandle abazi ukuthi kwenzakalani ngaphakathi eqenjini. Bazama ukuqagela kanti lokho abakushoyo akulona iqiniso. Ngicabanga ukuthi abantu kumele bakuqonde ukuthi ibhola umdlalo wamaqembu. Noma ngubani umqeqeshi akhetha ukumnika ijezi ngosuku lomdlalo nguyena okusuke kufanele adlale,” kusho uKgatlana ethimbeni labezindaba leSafa. “Kuyo yomithathu imidlalo besibumbene, silwa ndawonye. Bekunzima…