Tabla de contenidos para May/June 2024 en Tuis

’n Vriendin stuur nou die dag ’n boodskap: Hulle trek, “en wat maak ek met al my CD’s?”. Goeie vraag, tik ek terug. Daar is nie eens meer ’n CD-speler in my kar nie. En die een in my huis het pas die gees gegee. Kan mens dit ooit nog laat herstel? Annette, ons digitale redakteur, stel die vraag op sosiale media. En die kommentare wissel (kyk op bl. 6 ): van verontwaardigdes wat sê hulle luister nog elke dag daarna, tot iemand wat sê jy kan ’n sonkragpaneel daarvan maak! (Huh? Ons sal bietjie navorsing doen en terugrapporteer.) Die snaaksste een was van ’n leser wat skryf: “I still play my Christmas ones to infuriate my husband and I have the odd one in my car to freak out…

KOSBAAR Inspirasie vir die Orissamateriaalreeks deur ILIV vir St Leger & Viney kom van die ryk tapisserieë van Indië, met juweelkleure wat warmte en ’n gevoel van positiwiteit oordra. Sien stleger.co.za. Mooi aards Lisburn-kussingoortreksel van linne (op die foto in die kleur Bronze; 60 x 90 cm) R700, mungo.co.za PATRONE & PRENTJIES Palm Tree- bedrukte mat (1,5 x 2,3 m) met ingeboude glyvaste rugkant R1 795, airloom.co.za Kleurtrends! Woolworths het pas hul kleurreeks vir die herfs en winter bekend gestel. Hul herfstema, Artisanal, word gekenmerk deur aardse skakerings van rooi, olyfgroen en taan, terwyl die wintertema, Nostalgia, bestaan uit donker, dromerige groenblou tone gekombineeer met saffraangele en taan kleure. “Al twee hierdie temas en palette berus op natuurlike skakerings van klip, grysgeel, kameel en toffie,” verduidelik Courtney Louw, senior ontwerper.…

WIE WOON HIER? Gary en Taryn Uys en hul kinders, Ben (11) en Hanna (9)WAAR Elaleni Coastal Forest Estate, KZN GROOTTE 600 m² ‘Volg altyd jou instink. En gebruik artikels wat jou na aan die hart lê in jou huis, al is dit nie die heersende mode of jongste gier nie – jy sal nie spyt wees nie.” Dit was Taryn en Gary Uys se ingesteldheid tydens die beplanning van hul nuwe gesinshuis aan die noordkus van KwaZulu-Natal. Die resultaat is ’n onopgesmukte kontemporêre staalraamstruktuur met tradisionele leiklip- en blokkiesvloere, gesaksmeerde baksteenmure, glanspunte van natuurlike klip, en rou houtdetail – voorwaar ’n viering van teksture en kleure! “Ek en Gary het albei ’n diep sin vir nostalgie; ons hou van ‘ou goed’, artikels wat met sorg gemaak is van natuurlike…

E-pos jou vrae na kenners@tuis.co.za. VRA OP FACEBOOK Het jy ’n dringende vraag wat net nie kan wag nie? Vra sommer op Facebook, en onthou om ’n foto in te sluit sodat die span, kundiges en ander lesers kan help. ’n Stilis se wenke Skep die perfekte uitstalrak Toe ons kreatiewe redakteur Marian van Wyk die opdrag kry om ’n kombuisrak van nuuts af te stileer, het sy haar towerstaf van onder af boontoe geswaai. Sy vertel hoekom, en verklap ’n paar wenke: Solied en donker onder, lig bo Dié basiese ontwerpbeginsel is geïnspireer deur die natuur, waar donkerder kleure (grond, gras, klip) onderlangs te sien is en die ligte kleure (blou of grys hemelruim) bo. Ek het swaarder artikels op die onderste rak gepak en die glasware hoër op.…

WIE WOON HIER? Heather en Colin Batchelor, hul seun Jamie en die honde Joey en RosieWAAR Houghton Estate, JohannesburgGROOTTE VAN TUIN 1 500 m²GRONDTIPE Hoofsaaklik klei aangevul met kompos en grondboontjiedoppe vir dreineringOUDERDOM VAN TUIN 14 jaar “Enige tuin moet iets bied wat jy kan pluk, hetsy blomme, vrugte of groente,” glo Heather Batchelor, ’n vertaler. En Heather kan haar sterre dank, want sy het al drie opsies op haar werf: blomme uit die grasveldtuin voor haar huis, groente uit die beddings by die kombuis en ‘Catawba’-druiwe van die wingerdprieel wat oor die eetstoep rank. Veertien jaar gelede, toe Heather en Colin Batchelor ingetrek het by hul huis wat uit 1902 dateer, was daar nie veel van ’n tuin nie. “Aan die regterkant van die erf, soos jy die eiendom…

Oondhoender met olywe Onder R130 • Genoeg vir 4 • Voorbereiding: 15 minute Gaarmaaktyd: 40 minute • 800 g baba-aartappels, gehalveer• 4 hoenderkwarte (of 8 hoenderdytjies)• 1 suurlemoen• 45 ml olyfolie• 5 ml gedroogde Italiaanse kruie• 100 g olywe, ontpit• 200 g groenbone, gaar gestoom• 30 ml kappertjiesaad• ’n strooisel vars basilie 1 Voorverhit die oond tot 200 °C. Kook die aartappels in soutwater vir 10 minute. Maak intussen 5 diep insnydings tot op die been van elke hoenderporsie. Rasper die suurlemoen se skil fyn, meng dit met 15 ml van die olyfolie, die gedroogde kruie en ’n ruim knypie sout en peper, en vryf die hoender goed daarmee in. Braai in ’n warm pan tot goed bruin en halfgaar. 2 Dreineer die aartappels en meng dit met die res…

WENBRIEF Storie van ’n buffeltrofee Linda Rautenbach van Gqeberha skryf Nou die dag is ek na ’n veiling agter ’n leerbank aan. Parkeer die Caddy (vir die inlaaislag) amper voor die huis en sien die bank: Baie mooi, en duidelik baie duur. Maar hy sit soos ’n klip! Drentel toe maar teen die wenteltrap op en af soos iemand wat ’n entrance maak. Bo is dit die ene dierkoppe – maar ek hou van diere lewendig, in die veld. Die bieëry begin, en minute later strike die paw paw die fên. Moes ’n hot flush gewees het, want ek hoor my eie stem, en besef te laat ek het pas ’n buffelkop so groot soos ’n klein karretjie gekoop. Op pad uit vertel die eienaar hoe hy die dier vir…

1 Kies ’n kombers ’n Weelderige kombers is dikwels al wat nodig is om ’n ruimte nuwe trefkrag te gee. Party kom wel teen ’n prys, maar beskou dit as ’n belegging wat jy eendag as erfstuk kan nalaat. In die selfdoenghoeroe en bouer Karin Cronjé se kamer is ’n manjifieke wolkombers met blare in ’n diep jadegroen die apploustrekker. Die materiaal is dig vervilt – ideaal vir ekstra definisie en kleur in ’n gesellige plaashuis óf trendy stadswoonstel. 2 Onthou vir blou Blou, ’n gunstelingkleur vir fokusmure in slaapkamers oor die wêreld heen, is die perfekte roete om jou reguit droomland toe te neem. Hierdie kinderkamer in ’n nagmaalhuisie van ouds op Richmond in die Noord-Kaap is ryklik ingeklee met dekor en sagte meublement wat by die gebou se…

E-pos jou vrae na troeteldiere@tuis.co.za. Koning Leeu Rooimier, ’n Maine Coon, tuur oor die vlaktes. – Thia van Wyk, Letsitele, Limpopo Spekvet en gesond Rebecka is tevrede met die toestand van die spekboom. – Christelle de Kock, Krugersdorp Die goue uur Lilli verkyk haar aan die sonsondergang oor die Vaaldam. – Bettina Herbert, Pretoria Blaas tog nou daai fluitjie! Dié kieters is tydens die Rugbywêreldbeker aangeneem. Faf is poegaai, maar Rassie het g’n einde nie. – Marais Neethling, Stellenbosch Blaaskans Snowy die Biewer-terriër bring ure op die trampolien deur. – Lee-Ann Bezuidenhout, Newcastle, KZN Ligte, kamera, aksie! Dennis die mopshond is altyd gereed om te poseer wanneer sy “ma” met haar kamera mik. – Leonie Jordaan, Somerset-Wes Mooi gedagte! Op reis met vierpootmaats? Bederf hulle met weelderige verblyf by die…

NUUT! Handgemaakte Marokkaanse brandkleurteëls vanaf R1 150/m² (verseëlaars uitgesluit), Moroccan Warehouse VERSKAFFERS Babylonstoren shop.babylonstoren.com Cape Garden capegardencentre.co.za Elevenpast elevenpast.co.za Garden Bleu gardenbleu.shop Hertex Haus hertexhaus.co.za Incanda incanda.co.za K. Light klight.co.za Moroccan Warehouse moroccanwarehouse.com Poetry poetrystores.co.za…

Pasta met broccolipesto Die heldergroen pesto kan ook as doopsous saam met brood of groentestokkies voorgesit word; dit maak boonop ’n heerlike sousie saam met geroosterde hoender en gebakte aartappels. Genoeg vir 6 • Voorbereiding: 25 minute • Gaarmaaktyd: 10 minute • 500 g spaghetti• 1 mediumgroot kop broccoli, stingel verwyder, blomme fyn opgesny• 125 ml gerasperde parmesaankaas• 125 ml geroosterde amandels of kasjoeneute• gerasperde skil van 1 suurlemoen• ’n groot hand vol basilieblare• 1 klein knoffelhuisie• ’n knippie rissievlokkies• sowat 60 ml olyfolie• 100 g groen olywe gestop met ansjovis, kleiner gesny 1 Kook die pasta in soutwater tot al dente. 2 Terwyl die pasta kook, sit die fyngekapte broccoli in ’n groot mengbak en giet kookwater oor. Laat staan vir 5 minute. Dreineer en sit die geblansjeerde blomme…

PURE VREUGDE Die 2023-La Motte Vin de Joie Rosé (R110, la-motte.com) met sy onmiskenbare note van nektarien, spanspek, roosblare en Turkse lekkers is die perfekte pasmaat vir vertroostende vissop of seekospaella in die winter, en vars slaaie en fyngesnyde charcuterie in die somer. Mal hieroor! Die nuwe Poetry Stores Collab met Sera Holland vertoon Weskus-veldblomme wat met die hand geskilder is op keramiekborde. Hier is een van ’n beperkte aantal Oval Platter-skeppings (R1 299, poetrystores.co.za). MISDAAD vs. OORDAAD Tannie Maria, almal se geliefde amateurspeurder en troostante, het uiteindelik gehoor gegee aan haar volgelinge se versoeke om ’n kookboek. Recipes to Die Live For (R400, Penguin Random House) bevat heerlike resepte uit Sally Andrews se eerste vier misdaadromans, asook enkele nuwighede soos spekboomroomys. Pasop vir doodeet! INKOPIE-SWIER Net herwonne materiaal word…

Dis altyd lekker om te lees wie die beker gewen het; ek is gek oor die nostalgie!– Jan Sauer Voel tuis Om ’n huislike gevoel in sy gasteverblyf te skep, is bo-aan Jan Sauer Lambrechts se prioriteitslys. Hy vind die eenvormige donkerblou palet in dié huisie op Richmond in die Noord-Kaap-Karoo skep ’n knus gevoel in die winter, en koelte in die somer. Sy liefde vir die Karoo-landskap lê diep. In die hoofslaapkamer hang ’n afdruk van ’n foto wat hy op hul plaas in die De Aar-omgewing geneem het. “Hier is nie ’n groot venster met ’n uitsig nie,” sê hy. “Nou kan mens darem van die bed af na die uitgestrekte landskap kyk.” Trofeë, soos dié op die tafeltjie, duik oral in sy huise op. Soms staan dit…

WIE WOON HIER? Monique en Dehan Opperman, en die aanneemhond LokiWAAR Napier, OverbergGROOTTE 225 m², stoep (50 m²) en tussenvlak (25 m²) ingesluit Dis nie aldag dat ’n stofstraatdorpie soos Napier nuwe huiseienaars kry wat jonger as 30 is nie. Mense blits meestal hier deur op pad na Agulhas of Struisbaai, hoewel die ingeligtes weet waar om vir ’n goeie melktert of plaaslike wyn te stop. “Dit voel soos ’n plaas, sonder dat ons op ’n plaas bly,” sê Dehan Opperman. Maar in 2019 het hy en Monique nog nooit van die Overberg gehoor nie, wat nog te sê van Napier aan die voet van die Soetmuisberg, waar Dehan se ouers, Derick en Renette Opperman, kom aftree het. Dehan het destyds pas in die sake-intelligensiebedryf begin werk, en Monique was…

Die studente by ons 2023-dekorskool het lieflike ruimtes geskep, almal perfek vir salig slaap en soete drome. Kyk net wat hulle gedoen het, en kry inspirasie uit hul slim planne vir jou eie huis! Wat ons getref het in dié kamer ... ’n Groen fokusmuur was die “uitdaging” in dié slaapkamer, maar Hendrik Marais van Kaapstad het dié trendy kleur uitstekend tot sy voordeel gebruik, pleks van daartéén te werk. Die geheim is om kontras te skep, en dis presies wat hy gedoen het met ’n mengsel van neutrale en geblomde strooikussings, asook een enkele gele vir ’n speelse kinkel. Die geel tone word in die dekens herhaal, wat vir samehang en visuele harmonie sorg. Pleks van ’n kopstuk bied ’n stapeltjie groot en klein strooikussings sagte steun vir jou…

OPKNAP E-pos jou opknap na kenners@tuis.co.za. WIE WOON HIER? Noeline en Piet MaraisWAAR De Aar-distrik, Noord-KaapGROOTTE 60 m² ’n Ou “bywonershuisie” van oor die 100 jaar oud, met net ’n kombuis en geen aparte vertrekke nie, het Noeline Marais nog altyd gefassineer sedert sy sewe jaar gelede met Piet getrou en plaas toe getrek het. Sy wou graag die huis red, en om die koste van die projek te regverdig was gasteverblyf die logiese motivering – veral tydens die jagseisoen wanneer ekstra slaapplek altyd in dié geweste in aanvraag is. “Toe ons uiteindelik in Januarie 2023 begin, het ons gereken die projek sal sowat ses weke duur, maar toe word dit ses maande!” vertel Noeline, deesdae ’n ma van twee. “Die gebou, wat die afgelope 30 jaar as gereedskapkamer gebruik…

WIE WOON HIER? Johan en Minki du ToitWAAR Waterkloof, PretoriaGROOTTE VAN TUIN 750 m²GRONDTIPE Rooi, klipperige grondOUDERDOM VAN HUIDIGE TUIN 27 jaar “Ons woon op ’n gedeelte van ’n onderverdeelde erf waarop nie veel tuingemaak is voor ons in 1996 hier ingetrek het nie,” vertel Minki du Toit van Pretoria. Daar was wel ’n paar bome soos die inheemse huilboerboon (Schotia brachypetala), twee witstinkhoute (Celtis africana) wat ongelukkig intussen van ’n swamsiekte dood is, en ’n baie groot boom wat net op ’n dag met ’n groot gedruis omgeval het,” vertel sy. “Al weet ons nie watter soort dit was nie, was dit ’n groot verlies – want op die stoep het dit altyd gevoel asof jy binne-in die boom sit.” Maar dié kranige tuinier het altyd ’n plan. Die…

KOS STAP VIR STAP Wenk Die brosgebraaide garnaalkoppe gee ’n heerlike knars aan die brijani; gebruik dit as garnering saam met gekookte eiers en sit dit voor met ekstra jogurt. Genoeg vir 6 • Voorbereiding: 1 uur Gaarmaaktyd: 50 minute STEURGARNALE • 700 g heel steurgarnale• 5 ml rissiepoeier (of na smaak)• 5 ml borrie• ’n knippie sout• 15 ml vars suurlemoensap• 15 ml olyfolie GEELRYS • 2 koppies basmatirys• 2 lourierblare, vars of gedroog• 2 naeltjies• 6 heel peperkorrels• 5 ml borrie of fyn saffraan• 5 ml sout SOUS • ’n goeie skeut olyfolie• 1 kaneelstokkie• 5 kardemompeule• 1 groot ui, fyngekap• 15 ml fyn brijani- of vismasala• 2 cm vars gemmer, geskil en fyngerasper• 2 vet knoffelhuisies, fyngekap• ’n takkie kerrieblare (of 1 lourierblaar)• 2 groot tamaties, in…

AGTERBLAD Skottelgoedwas by my is deesdae geen uitgerekte besigheid nie. Een bord, mes, vurk, ’n pot. Maar ek doen dit nogal klokslag. Gewillig en tevree, soos die ou digters sou sê. Eintlik meer as dit – ek doen dit met graagte. As ek saam met my familie iewers is, debs ek eerste die rol van skottelgoedwasser. Natuurlik gee dit konstant ’n stryery af. Almal voel skuldig wanneer kiepie, soos ’n Aspoester van ouds, die “vuil werk” ná ’n gesellige ete moet staan en opruim. Dan bly hulle rondhang, verdring mekaar by die afdroograk. Tot ek my geduld verloor en almal uitjaag. Vamoose ! Daar’s iets vredigs aan die ritueel, het ek hier in my later jare ontdek. Aan die orde en reëlmaat van die proses: Jy begin by die skoonste…