Tabla de contenidos para September 2018 en Weg!

Ek sonder nie gewoonlik een Weg- storie bo ’n ander uit nie… Dis omdat ’n mens bak wanneer jy ’n goeie tydskrif skep – jy kook nie. Wanneer jy kook, kan jy ’n klomp bestanddele bymekaargooi sonder om noodwendig ’n resep te volg. ’n Bietjie hiervan, ’n tikkie daarvan. Jy proe, jy voeg by, jy laat prut dit ’n bietjie langer en jy meet nie juis iets af nie. As jou instinkte reg is, is wat jy ook al gekook het, hopelik lekker wanneer jy opskep. En as dit nie lekker smaak nie, gooi jy sout of tamatiesous of Mrs Balls by om die smaak te verdoesel as jy die kluts effe kwyt geraak het. Maar met bak kan jy nie sulke kanse vat nie. Jou resep moet beproef wees.…

DARLING-VELDBLOMMESKOU Dis heerlike lente! Kom kyk na uitstallings van die Darlingstreek se veldblomme in hulle natuurlike habitat – dit sluit renoster-, riet-, sand- en strand-veld in. Hier is ook kos- en handvlytstalletjies, ’n uitstalling van klassieke motors en trekkers, en ’n vermaaktent, asook ’n speelplek vir kinders. Wanneer? 14-16 September Tyd Vrydag en Saterdag: 9 vm.-5 nm.; Sondag: 9 vm.-3 nm. Waar? Darling-gholfklub, Jacarandastraat, Darling Koste Volwassenes: R60; kinders jonger as 18: R40; kinders jonger as 2: gratis. Op die Vrydag betaal pensioentrekkers net R40. Koop kaartjies by quicket.co.za Nog inligting 084 916 1111; darlingwildflowers.co.za ERFENISWYNPROE, STELLENBOSCH HILLS-KELDER Die Stellenbosch Hills-kelder het sy gewone biltong-en-wyn-proekombinasie aangepas vir Erfenismaand. In September kry jy nou ook ’n sewende wyn om te proe, met ’n koeksister of koesister (jy…

KAPOET, WILLOWMORE Willowmore in die Oos-Kaap is strategies geleë: Dis op die randjie van die Groot-Karoo en van hier af kan jy die Swartberg (wes), die Baviaanskloof (oos) of die Tuinroete (suid) invaar. Dis ’n oulike dorpie net langs die N9 en die ideale plek om bene te rek op julle road trip . Kapoet is ’n padstal-en-restaurant in Knysnastraat – die hoofstraat deur die dorp. Sit in die somer op die stoep langs die sypaadjie en geniet die briesie, of maak julle tuis by een van die tafels binne as daar sneeu op die bergpieke lê. Die spyskaart het ruim ontbytopsies (vanaf sowat R40), roosterkoektoebroodjies (R50-R70), goeie koffie, warmsjokolade en pannekoeke (vanaf sowat R25). Hier is ook stewiger maaltye beskikbaar, onder meer lasagne, bobotie en slaaie.…

Nadat die bewaringsgesinde en skrywer Lawrence Anthony skielik in Maart 2012 oorlede is, kon sy weduwee, Françoise Malby Anthony, nie te lank treur nie. Hulle Thula Thula- private wildreservaat in KwaZulu-Natal is al hoe meer deur stropers bedreig en sy moes leiding neem. In An Elephant in my Kitchen, die opvolg van die internasionale topverkoper The Elephant Whisperer (2009) skryf Françoise (saam met Katja Willemsen) hoe sy en haar span wildbewaarders en vrywilligers Lawrence se nalatenskap bewaar het en hoe sy sonder hom by Thula Thula aangepas het. Sy vertel vir Calyn Moneron meer oor haar werk en boek. Wat het jou gehelp om vorentoe te kyk ná jou man se dood? Die bewaring van ons renosters was my verantwoordelikheid; dus het ek geen ander keuse gehad as om die…

Indien die gedagte aan die Tunduma-grenspos jou ontsenu, ry van Kapishya noord na Mpulungu op die oewer van die Tanganjikameer. Slaap ’n aand of wat daar en ry dan deur die piepklein Kasesya-grenspos. Die pad tussen Mbala en die grens is sleg, maar dit raak later teer aan die Tanzaniëkant. Ry na Sumbawanga en dan suid na Tunduma tot jy weer by die hoofpad na Dar es Salaam aansluit. Of: Draai noord by Sumbawanga en ry ons voorgestelde roete kloksgewys. BLY HIER Luke’s Beach (Mpulungu) mishembebay@gmail.com  Lake Chila Lodge (Mbala) lakechilalodge@yahoo.com…

Semonkong Lodge, Semonkong Lodgekamers, chalets, rondawels en ’n kampterrein. Rondawels vanaf R250 p.p.; kamers vanaf R650 p.p. wat deel; kamp R150 p.p. Kontak 00 26 627 006 037; semonkonglodge.com Motebong Lodge, Lejone Selfsorghuisies met ’n uitsig op die Katsedam. Vanaf R1 850 p.n. vir ’n huisie met slaapplek vir vyf mense. Kontak 00 26 659 744 567; motebong.com St James Lodge Basiese verblyf by ’n Katolieke sendingstasie: twee slaapsale met ses beddens elk, plus twee ronddawels met slaapplek vir twee. Sowat R150-R200 p.p.p.n. Kontak 071 672 6801 (Sally Smith)…

Die Datoga-stam is veeboere wat in die Manyara-streek naby Arusha in Tanzanië woon. Hulle het sowat 3 000 jaar gelede suid getrek uit Suid-Soedan en Ethiopië. Daar is minstens sewe Datoga-stamme en die taal het verskeie dialekte. Die bewaringsfotograaf Scott Ramsay het in Oktober verlede jaar na Tanzanië gereis om foto’s te neem van wilderniskampe in die nabygeleë Maswaen Mwiba-wildreservaat. Dié foto’s is egter geneem by ’n Datoga-dorpie naby die Eyasimeer, suidoos van die Ngorongorokrater. Scott se mees onlangse portefeulje was in Weg #145, toe hy van die foto’s uit sy boek South Africa’s Wildest Places gewys het. Dié keer gee hy ons ’n blik op die stamlewe in Oos-Afrika. “Ek kon aanvoel dat die mense aanvanklik skepties was oor my teenwoordigheid,” sê hy. “Die mans en vroue het saggies…

Kos wat in die buitelug gemaak word, proe net ánders – lekkerder – as kos wat jy in die kombuis by die huis maak. Dalk is dit omdat jy weer terugkeer na eenvoudige dinge. Jy maak hout bymekaar en pak dit net reg – eers met fyn houtjies en dan die groter stukke, voordat jy dit met ’n vuurhoutjie aansteek. As die lig begin kwyn in jou boskamp, kry jy jy ’n gevoel van genoegdoening: Jy is omring deur die natuur en jy het ’n knetterende vuur. Dit maak nie saak of jy wild gesoek het langs die Olifantsrivier in die wildtuin, of heeldag gery het na ’n geheime kol soos Chilojo Cliffs in Zimbabwe se Gonarezhou- nasionale park nie –jy gaan aan die einde van ’n lang dag ’n…

Lank gelede land ek in die middel van die winter in Kiruna, die mees noordelike stad in Swede. Dis sowat 150 km noord van die Noordpoolsirkel en die vlieënier kondig saaklik aan dat die temperatuur buite -30 ºC is. Ek weet nie of ’n donsbaadjie in die koue kan smelt nie, maar dis wat met myne gebeur nadat die lugwaardin die vliegtuigdeur oopmaak. Dis soos die oorblufte losskakel van Rawsonville se 2de span wat hom skielik in ’n ysreën in ’n toets teen die All Blacks in Dunedin se House of Pain bevind. “Druk asseblief nog ’n drie mnr. Lomu. Moenie dat ek in jou pad staan nie,” sê my baadjie. ’n Baie groot Sweed groet ons in die klein aankomslokaal. Verbeel jou hy lyk soos Björn Lothbrok, oudste seun…

‘Laat ek jou vertel hoe dit hier werk,” gesels Marelize Swart, bestuurder van die Botrivier Hotel, waar ons in die dameskroeg met ’n koppie koffie sit. “Dis ’n piepklein plekkie, mense dink hier gaan boggherol aan as hulle hier deurry. Dan sien hulle hier’s lewe op die hotel se stoep. Dan ontmoet hulle die locals. En dan,” knipoog sy, “koop hulle grond hier.” Daar’s inderdaad niks bot aan dié dorpie nie. Botrivier kry sy naam van die oorspronklike Botterrivier wat hierlangs loop, so gedoop in toeka se dae deur Hollandse setlaars wat botter geruil het by die Khoiveeboere. Vandag lê die dorpie en sluimer tussen die laslappies canolalanderye en wingerde wat so eie aan die Overberg is. En hy’s ryk aan hartlike karakters. Ryk en lekker. Marelize se ouers het…

Shakila-tentkamp, Modimolle Moenie dat die Shakila- private natuurreservaat se afgeleefde en onbemande ontvangskantoor jou van stryk bring nie. Laat jouself in by die hek en volg die bordjies tot by jou safaritent. Kyk, ’n mens kan sien die tentkamp se gloriedae is aan ’t kwyn, maar dinge is skoon, netjies en huislik. Trouens, dit voel soos ’n safaritent wat jou ouma versier het: Hier’s matte wat nie pas nie, gehekelde lappies op die bedkassies, bal-en-klou-stoele... Maar hier is alles wat ’n mens nodig het en selfs ’n paar onverwagte luukshede soos ’n buitelugstort (warm) en ’n borrelbad met ’n uitsig oor die bosveld! En vir die minder avontuurlustiges is hier ’n badkamer met ’n bad. Die blyplek is gebou van klip en seil met ’n houtdek wat hoog teen ’n…

WANNEER DIT REËN OP VERNEUKPAN, NOORD-KAAP Dis Desember 2016, en ons is op pad na Verneukpan. Kniehoogte Karoobossies strek van horison tot horison. Hoe nader ons egter aan ons bestemming kom, hoe meer sien jy grond en hoe minder sien jy plante. Dis droog. Links van my, ver op die vlakte, sien ek ’n dwarrelwind. En dan nog een. Ek word stadigaan bewus van iets wat in die atmosfeer verander. Die horison aan my kant is baie blouer as die een ander kant. Daar is ’n donderstorm aan die broei, en ek neem ’n paar foto’s met my Nikon D7000 en Nikon 18-140 mm-lens 1 . Dis nie aldag dat dit in die Karoo reën nie, wat nog te sê Verneukpan! Ek het nog nooit so baie dwarrelwinde gesien nie.…

Hierdie is die hoogwatertye vir Kaapstad. Vir ander plekke tel jy die minute by of trek dit af (let wel, hierdie is benaderde tye): Saldanha: +5; Hermanus: -4; Port Elizabeth: +19; Durban: +26 Bron Gety-inligting met die vergunning van die Hidrograaf, SA Vloot. Die Hidrograaf is nie verantwoordelik vir enige transkripsiefoute nie. sanho.co.za SONOP & SONONDER (17 SEPTEMBER) Kaapstad 6.43 vm. en 6.39 nm. Bloemfontein 6.11 vm. en 6.09 nm. Johannesburg 6.03 vm. en 6.02 nm. Durban 5.52 vm. en 5.49 nm. Bron saao.ac.za…

Huppelkind deur W.O. Kühne Tafelberg, 1958 (nuwe heruitgawe in 2018; R245) Met ’n wip en ’n trap seil Huppel oor die polle – trippel-trippel deur die grassies, huppel-huppel oor die plassies. Hy peil diekant toe en die wolke seil daardie kant toe, en die vleiwind pluk aan sy kuif. O, hy voel so lekker verspot. Huppel-huppel saam met die wind, trippel-trippel, Huppelkind! Ek het as sesjarige ure lank in my ouma Charlotte Rens se woonstel op Uitenhage op die mat gelê en deur die ses dun Huppel-boekies geblaai. Dit was saam met die destydse Afrikaanse Kinderensiklopedie van die eerste Afrikaanse stories wat ek geniet het. Wilhelm Otto Kühne (1924-1988) is gebore op Graaff-Reinet en het later as ’n onderwyser, joernalis en jeugskrywer gewerk. Hy het 20…

Dis duur omdat jy in Amerikaanse dollar gelooi en oor dieselfde kam geskeer word as ander oorsese toeriste. Ruaha, Mikumi, Katavi en Mkomazi val in die goedkoper kategorie en kos US$36 (R483) p.p.p.d. (kinders jonger as 16 kry afslag). Arusha, Tarangire en Manyarameer is een trappie hoër teen US$53 (R711) p.p.p.d. en Serengeti kos US$71 (R952) p.p.p.d. Voertuigtoegang kos oral US$48 (R644) per dag en kamp vanaf US$36 (R483) p.p.p.n. Party parke het goedkoop rondawels ( bandas ) wat soms dieselfde kos as kamp. Let wel: Hierdie pryse sluit 18% BTW in. Jy betaal gewoonlik met ’n kredietkaart by ontvangs, maar hou kontant (dollar) byderhand. tanzaniaparks.go.tz Sien kassie op bl. 36 vir Ngorongoro (dis nie ’n nasionale park nie).…

WEG SE KEUSE BAOBAB’S FARM COTTAGES & BAOBAB’S BUSHVELD REST Baobab’s Bushveld Rest se eenhede is op Marnitz reg langs die N11, en die Baobab’s Farm Cottages is op ’n plaas sowat 7,5 km noord. Selfsorg: R620 p.n. vir 2 mense wat deel, daarna R220 p.p. ekstra. Doen navraag indien jy maaltye wil hê. Troeteldiere welkom slegs by die Farm Cottages. Kontak 082 708 1928 (Anél); 082 851 2151 (Henk) anel.malan@worldonline.co.za ; baobabaccommodation.co.za KOKOMORI BIRDER’S LODGE  Ja, jy gaan lekker voëls kyk hier! Die selfsorgkliphuise (R300 p.p.p.n.) is tussen groot bome langs die Limpoporivier en hier’s ook ’n private boskamp ’n ent weg as jy ’n voetjie nader aan die natuur wil kuier (R350 per voertuig p.n.; geen elektrisiteit). Troeteldiere toelaatbaar, maar op…

T-beensteak met ’n roomsous Vir 4 Voorbereityd 15 minute Kooktyd 10 minute ’n Happie sappige steak, ’n happie kraakvars blare en ’n happie romerige sous... dit smaak mos sommer soos somer, man! Jy benodig • 6 ansjovisfilette • 1 eetlepel Dijonmosterd • 1 eetlepel suurlemoensap • ½ koppie suurroom of crème fraîche • 4 T-beensteaks • gemaalde growwesout en swartpeper na smaak • 2 klein gem-slaaikoppe, gewas Só maak jy 1 Kap die ansjovisfilette so fyn as moontlik en meng dit met ’n vurk goed met die mosterd, suurlemoensap en crème fraîche. Hou dit in die yskas totdat jy dit nodig het. 2 Sorg dat die steaks kamertemperatuur is voordat jy dit braai. Geur dit met sout en peper en braai dit dan ongeveer 4 minute aan ’n kant of volgens jou smaak tot gaar. Haal die…

Intex River Ratopblaasbinneband Hierdie binneband is op twee maniere ’n verbetering op die standaard-trekkerbinneband: Dit het ’n dubbele lugkamer vir veiligheid (as die een kant ’n gaatjie kry, sal dit steeds dryf ) en dit het ’n tou buite-om om aan vas te hou of die band te dra. R150 by Sportsmans Warehouse CapeStorm Riptide Aquaskoene Skerp goed kruip dikwels in die vlak water weg: stukkies koraal, klippe, stokkies, gebreekte glas van die vorige ou se braai... Hierdie waterdigte tekkies het ’n taai rubberbuitesool om jou voete te beskerm en dreineer goed danksy die maasbokant. R500 by Sportsmans Warehouse Aqua Marina Thrive opblaas- SUP-bord Om te SUP (dit staan vir “stand-up paddle”) is ’n kruising tussen kajak- en branderplankry. Die bord is groot en dryf, maar…

DAG 1 Ons avontuur deur die Kalahari begin by die eerste kampplek – Twee-Rivieren in die Kgalagadioorgrenspark. ’n Laatmiddag-wildrit is opsioneel. Ná die lang rit kan jy in die swembad afkoel. Die aand om die kampvuur kan almal mekaar beter leer ken terwyl ons weglê aan aandete wat deur ons bossjef voorberei is. DAG 2 & 3 Ons mik vandag vir Nossob, waar ons die volgende twee aande bly. Langs die pad maak ons ’n draai by die Auchterlonie-museum waar jy meer oor die park se geskiedenis leer en ons stop vir middagete. Wanneer ons by die kamp aankom, staan ons tente en koffie en tee reeds vir ons en wag. Die volgende dag begin met koffie en beskuit vroegoggend, waarna jy die kamp kan verken of ’n wildrit kan…

3 plekke vir adrenalienwatersport Swem op sy tyd is heerlik, maar dalk wil jy vanjaar ’n effens wilder waterperd opsaal en ’n adrenaliensportsoort aanpak? PUNT IN DIE WIND Die Kaapse Dokter is nie almal se pêl nie, maar sy een groot voordeel is dat dit die winderige Kaap ’n uitstekende bestemming vir vlieërplankryers ( kite surfers ) maak. Big Bay by Bloubergstrand (net buite die Kaapse middestad) is die tuiste van die jaarlikse internasionale King of the Air-kompetisie, maar die Plaat by Grottostrand in Hermanus, Witsand aan die Breërivier en Langebaan aan die Weskus is ook lekker plekke om dié sportsoort te beoefen. As jy ’n groentjie is wat graag wil leer, klop aan by Kite Lab ( kitelab.co.za ) op Langebaan. Pakkette (wat die leen…

Die lewe in die woestyn is taai en die Kalahari – hoewel nie ’n woestyn in die ware sin van die woord nie – is geen uitsondering nie. Ek het dit weer met ’n onlangse besoek aan die Kgalagadioorgrenspark besef toe ek by die watergat in die Nossobruskamp sien hoe selfs die koning van die diere dankbaar is vir ’n “gratis” wegneemete. Die edelvalk – een van Suider-Afrika se grootste en vinnigste valkspesies – hou in die Kalahari. Hulle kry gewoonlik hulle sit ’n entjie van ’n watergat af en hou ’n ogie op die hordes vinke, duiwe en sandpatryse wat noodgedwonge tot in die gevaarsone langs die oop watergat moet beweeg om hulle dors te les. Die valk slaan dan toe en vang gewoonlik ’n voël in vlug aan…

Van waar die liefde vir die buitelewe en stap? My wortels lê in die inkangala (hoëveld) naby my tuisdorp, Piggs Peak, in Swaziland. Dis heuwelagtig hier, en ek het as kind oral heen gestap – en ek is steeds fiks! Ek het ook tyd in Bulembu deurgebring, ’n dorp aan die voet van Swaziland se hoogste berg en waarskynlik die heuwelagtigste dorp in die land! Ek het tot ’n paar jaar gelede nie veel geleentheid gehad om te reis nie. Maar toe het ’n vriend wat die Otter-staproete wou doen, my saamgenooi. Dit was die eerste keer dat ek met ’n rugsak gestap het, maar danksy die hutte is die roete heel gemaklik. En dis skouspelagtig mooi! Ek het ’n stapdagboek gehou en dit later in…

Wanderlust – A History of Walking  deur Rebecca Solnit, Granta Rebecca Solnit is ’n bekende Amerikaanse skrywer, geskiedkundige en aktivis wat reeds 20 boeke op die rak het. Wanderlust is reeds in 2001 gepubliseer en in 2014 heruitgegee. Enigeen wat al ver en lank gestap het, behoort saam met Solnit te stem wanneer sy skryf:“Walking, ideally, is a state in which the mind, the body, and the world are aligned, as though they were three characters finally in conversation together, three notes suddenly making a chord. Walking allows us to be in our bodies and in the world without being made busy by them. It leaves us free to think without being wholly lost in our thoughts.” Solnit ontsluit die geskiedenis van stap op ’n fassinerende manier: Sy…

Hoop daai boom is oukei deur Riku Lätti R79,99 op iTunes In ’n meer regverdige wêreld waar profete wel in hulle eie land geëer word, was Riku Lätti al lank ’n huishoudelike naam en het sy albums platinumverkope behaal. Met sy Wasgoedlynprojek het Riku ook die afgelope paar jaar baanbrekerswerk gedoen om skeppende musici in hulle eie omgewing op te neem. Dié nuwe album se 13 liedjies is ’n eklektiese kragtoer wat Riku saam met sy vrou, Jackie, en die MarkTunes Band (Mark Ellis op baskitaar en Jean Tunes Marais op tromme) aangepak het. Of hy nou ’n klavier, trekklavier of elektronika as begeleiding gebruik, is Riku se musiek altyd vars, vernuwend en hoogs luisterbaar – of jy nou agter lorries op die N1 of in die wye Tankwa-Karoo ry.…

As jy vinniger deur Zambië wil ry – en die Kafue- nasionale park wil uitsny – steek die Zambesi oor met die Kazungulapont en oornag op Livingstone (besoek die Victoriawaterval). Van daar af kan jy die hoofpad volg na Lusaka, en weer teen dag 9 by ons reisplan aansluit. Die Kazungulapont-grenspos is bedrywig, en deurmekaar aan die Zambiese kant. Hulle bou nog aan die brug oor die rivier. Let wel: Die pad tussen Kazungula en Sesheke is sleg. Dis hoekom ons roete eerder deur Namibië loop. BLY HIER Maramba River Lodge (Livingstone) maramba zambia.com  Moorings Campsite (tussen Monze en Mazabuka) mooringscampsite.com…

Dié gorillas is uiters bedreig en dit verg ’n allemintige poging om hulle te beskerm, maar Rwanda het onlangs die permitprys verdubbel van US$750 (R10 065) tot ’n onbesonne $1500 (R20 133) p.p. Tog stroom toeriste hierheen (jy moet maande vooraf bespreek). Om in die bamboeswoud saam met ’n familie gorillas te sit bring hulle benarde bewaringsposisie (en die mens se rol daarin) in perspektief. reservation@rwandatourism.com Nota Permitte in die buurland Uganda is goedkoper teen US$600 (R8 051). ugandawildlife.org…

Die Maletsunyane-waterval! Hoe lank droom ek nie al daarvan om by dié waterval te staan nie! In 1973 het my oorlede man, Ian, en ’n paar van sy Bergklubpêlle van Qachasnek verby hierdie manjifieke waterval na Maseru gestap. Hulle vertellings het my begeester. Nou staan ek hier bo die ravyn, met die hoë waterval wat donderend na onder stort. Langs die waterval abseil ’n paar dapperes na onder. Ek sien dassies, ’n Kaapse kliplyster, ’n kransvalk en ’n lammergeier; rooivlerkspreeus en swaels swiep verby. Ons groepie het gister in Semonkong (“plek van rook”), die naaste dorpie aan die waterval oornag. Ek, Dave, Elmarie en Danie het in my Landie gery; en die susters Marise en Annelee in ’n Suzuki Jimny. Ons het van Ladybrand af gery met die A2 en…

HOEKOM? Ons plaas elke maand ’n keur van lesersfoto’s. Moenie skaam wees nie – krap ’n bietjie daai foto’s uit wat jy op jou rekenaar opgaar en stuur hulle vir ons! WAT? Ons hou van omtrent enigiets: natuurlewe, landskappe, portrette, vakansiefoto’s of goggas en blomme in jou tuin. HOE? Stuur jou beste foto’s na menseselense@weg.co.za  Moenie lêers stuur wat groter as 4 MB is nie – as ons ’n groter weergawe soek, sal ons daarvoor vra. Gee die fotograaf se naam, van, tuisdorp en kontaknommer. Stuur ook inligting oor waar en hoe die foto geneem is en watter toerusting gebruik is. As jy die foto op enige manier gemanipuleer het, vertel ons wat jy gedoen het. DIE FYNSKRIF Ons behou die reg voor om jou foto’s elders in…

Dis dalk ’n cliché om rooiwyn saam met vleis te bedien, maar daar lê wetenskap daaragter: Die proteïen en vet in ’n sappige steak help om die tannien in die wyn ’n bietjie te versag – so ook die geurmiddels wat enige goeie kok by sy vleissnit sal voeg voor dit gaargemaak word. Hier is drie lekker rooiwyne om te probeer. Suid-Afrika het nie juis baie malbecs nie, maar daar is nie ’n beter variëteit om saam met vleis te drink nie – vra maar vir enige Argentyn! Malbec is inkswart met baie donker, digte vrugtegeure, en hoewel dit oorspronklik uit Bordeaux en die aangrensende Cahorsstreek kom, word dit deesdae heeltemal met die land van Lionel Messi vereenselwig. Een van ons plaaslike malbecs – die Bellevue Malbec 2014 (R110) –…

NAMIBIË Op hierdie 14 dae lange toer sien jy van Namibië se hoogtepunte, onder meer die wilde perde van Aus, Kolmanskop, die duine by Sossusvlei, Swakopmund, Spitzkoppe en Etosha- nasionale park. Die toer begin by Lüderitz en loop al die pad tot in Etosha – met heelwat ideale plekke vir klassieke foto’s tussenin! WANNEER? 31 MEI-13 JUNIE 2019 HOE LANK IS DIE TOER? 14 dae, 13 nagte HOEVEEL KOS DIT? R20 450 per persoon (formele verblyf in tente) TRANS-BOTSWANA Die toer begin in Sentraal-Botswana by Kubu-eiland op die Makgadikgadipanne en eindig by Kasane/Chobe in die noorde ná ons tot in Namibië se Zambesistreek (voorheen die Caprivistrook) en by die Zambesirivier en die Victoriawaterval gaan draai het. WANNEER? 15-25 MAART 2019 14-24 JULIE 2019 HOE LANK IS DIE TOER? 11 dae,…

MADONNA-EN-KIND-WATERVAL, HOGSBACK Inheemse woude omring die dorpie Hogsback. Op hierdie roete stap jy deur dié woude – wat jou tegelykertyd herinner aan tonele uit Lord of the Rings , Blair Witch Project en Fiela se Kind – én verby drie watervalle. Kies waar jy wil begin: By die parkeerterrein langs die polisiestasie of hier waar ons nou staan, by die uitkykpunt net onder die backpackers Away With The Fairies. Bekyk eers die wêreld om jou voor jy woud-in vaar: Doer onder in die vallei lê en blink die Tyumeriver, omring deur die goue kranse van die Hogsbackberg (1 845 m). Die berg het glo sy naam gekry in die tyd van die grensoorloë. Die Britse soldate het gedink die…

Hoe kom ek daar? Botrivier sit langs die N2 tussen Grabouw en Caledon, sowat ’n 1½ uur se ry uit die Kaap uit. Dis ’n puik basis waarvandaan jy die omgewing kan verken. Toerismeburo? Hier’s nie ’n amptelike toerismeburo nie. Die hotel ( bothot.co.za ) bly die beste plek om dinge uit te vind of gaan na botriverwines.com . Wanneer moet ek kom? Tussen einde Augustus en September, wanneer die canolalanderye goudgeel in blom staan. Wanneer vier die dorp fees? Hier vind drie groot gedoentes elke jaar plaas. Die Lentefees word oor die eerste naweek in September gehou, met die wynplase wat die beste voetjie voorsit in ’n groot makietie vir die hele gesin. Barrels and Beards word oor ’n naweek laat in Maart…

HOE WERK DIT? Gewoonlik blom dit eerste (Junie) in die laerliggende dele soos die Knersvlakte en Weskus, want dié dele is eerste warm. Sowat ’n maand later, wanneer die laer blomme uitgeblom is, begin die blomme op die hoër dele soos Kamieskroon, Nieuwoudtville en Springbok. Augustus is ’n goeie tyd om albei streke te sien, want dis gewoonlik die middel van die blommeseisoen. Darling se blomme staan nog bont tot einde September. HOE OORLEEF DIE BLOMME? Die blomplante van die Wes-Kaap en Namakwaland is óf eenjarig óf meerjarig. Die eenjarige plante – dis daai plate en plate wit, geel en oranje madeliefies – is vreeslike ywerige saadmakers. Duisende saadjies sluimer onder die grond in die warm somermaande en koue wintermaande. Hoe meer sade, hoe groter die kans dat hulle gaan…

“Ek is lief vir die natuur, want ek is lief vir skoonheid. Ek is ewig op soek na die volgende lieflikheid wat my asem gaan wegslaan: die Namib se duine, die sterre bo Spitzkoppe, die Weskus se verlatenheid. “Verneukpan is so totaal vreemd teenoor die wêreld waarin ek elke dag lewe (ek woon in Pretoria) dat dit vir my eksoties is. By ’n plek soos Verneukpan is dit asof alles wat nie regtig so belangrik is nie, weggestroop word sodat net die belangrikste dele van myself oorbly. Sulke plekke bring my weer in balans.”…

Dis Sondagoggend in Khartoem en my week het pas begin – soos in baie Moslemlande is die werksweek hier van Sondag tot Donderdag. Ek werk hier as Engelsonderwyser en onderwyseropleier. Wanneer ek my voet uit my woonstel sit, is die eerste tuk-tuk (of riksja, soos dit genoem word) reeds langs my. “Sbaa alkheer!” (Goeiemôre!) roep die bestuurder vriendelik, en ek spring in. Riksjas is berug vir hulle vreeslose benadering tot aankomende verkeer. Hulle dartel tussen verkeersbane soos haastige hoenders: Slaggate moet gepypkan word. Die sakekern van die stad – waar my kantoor geleë is – is buite perke vir riksjas om die verkeerslas te help verlig. Daarom klim ek af by die volgende buurt, bekend as Khartoem 2. Nou is dit net ’n kort ent se stap kantoor toe. Maar…