Tabla de contenidos para June 2015 en WegRy

Goed, laat ek nou maar eerlik wees en erken dat, hier waar ek nou sit, ek ’n bietjie g@tvol vir 4x4-bande is. En spesifiek mud terrains. Want ons het skaars twee weke gelede klaargemaak met nog ’n WegRy- uitkloptoets (kyk op bl. 39) wat ek glo die eerste in sy soort in Suid-Afrika is. Dit was harde werk wat ’n aanloop van ’n paar maande gehad het en vier volle dae se toetse behels het. Ek moet ook byvoeg dat, behalwe om die hele ding uit te dink, ek waarskynlik die minste werk van almal gedoen het. Dit was ’n helse spanpoging en ons sê hopelik genoeg dankie vir almal aan die einde van die artikel. Die uitslae het plek-plek vir ’n verrassing of twee gesorg en gaan ongetwyfeld ’n…

Die artikel “Die leeuloop in Mabuasehube” (WegRy #69) het ons laat terugdink aan ons lekker vakansie in Mei verlede jaar by Kamp 1 by die Mpayathutlwapan. Ons het daar aangekom vir ons besoek van vyf nagte en leeuspore gevind. Ons was baie opgewonde, want ons het ook nog nooit vantevore leeus in Mabuasehube gesien nie. Ongelukkig was spore toe al wat ons te siene gekry het, maar ons is op ’n ander eenmalige ervaring getrakteer. Die tweede aand van ons besoek het ons omstreeks agtuur om die kampvuur gesit en in die rigting van die pan gekyk, toe ons iets in die kollig op die rand van die kamp opmerk. Sowat 5 meter voor ons het ons die kolle van ’n jong luiperd gesien wat voor ons voertuig verbystap. Sjoe,…

LA Sport is terug in hulle oorspronklike winkel in Steve Biko-rylaan 385, Capital Park, Pretoria. Lionel, Annalie en hulle span was voorheen in Derdepoortpark, Pumulani, Pretoria. Die winkel verkoop al die ou sowel as nuwe LA Sport-4x4-produkte, het sy eie 4x4-baan en selfs ’n restaurant. Die geriewe is ook te huur vir funksies of byeenkomste. Die span wat jou by dié tak sal bystaan, is (agter van links): Alex Kleingeld, Chris Ntsikelelo, Mitch Viljoen, Thabu Chaucke, Ramon Lewis en Sam Masingi. Voor van links is Louis van Niekerk, Melissa Lewis, Annalie Lewis, Jolandi de Jader, Tillie Swart en Sara Ndhlovu. Bel LA Sport Pretoria by 012 329 4515.…

Strandry is op die meeste plekke in Suid-Afrika verbode, maar daar is nog ’n handjievol plekke oor waar jy tot teenaan die see kan ry. Strandry is ook in heelwat ander Afrika-lande verbode. Of jy dus na Sodwana of Mosambiek onderweg is, goeie 4x4-tegniek en -etiket sal jou goed te pas kom. Ken die reëls. As jy die kans kry om op enige strand te ry, maak seker dat jy van al die reëls en regulasies bewus is. Kry liewer ’n permit as wat jy ’n boete moet betaal of jouself uit die tronk moet lospraat. Onthou jou sandrytegniek. Strandry is baie dieselfde as duinry, wat ons in die vorige uitgawe (WegRy #71) bespreek het. Maak seker jy het die regte banddruk, behou momentum en bly in die bestaande spore.…

Sedert 1950 ontwerp en vervaardig Pedders namark-veringstelsels wat spesifiek vir die ongenaakbare toestande in Australië geskik is. Pedders-produkte lewer deurgaans goeie resultate in die moeilikste toestande, sonder dat dit afbreuk doen aan die goeie ritgehalte wat jy van moderne 4x4’s verwag. Dit maak die TrakRyder-veringstelsel by uitstek geskik vir die Afrika-vasteland. Ongeag of jy jou voertuig gebruik om daagliks te pendel, in die veld te ry of op safari’s te gaan, die TrakRyder-veringstelsel sal sorg vir ’n geriefliker rit met beter voertuighantering. Die TrakRyder-stel is vir die meeste voertuie op die mark beskikbaar en bestaan uit ’n stel van 4 Pedders-TrakRyder-skokbrekers, swaardienskronkelvere, bladvere, en al die nodige veringbusse. OOK IN DIE PEDDERS-REEKS BESKIKBAAR: Skokbrekers, kronkel- en bladvere, veerbusse, U-bout-en skakelstelle; sporingstelle; stuurdempers; verstelbare panhard-stange; koppelstawe en naafseëlstelle, sowel as ’n…

Deon van den Berg se 2002 Nissan Hardbody 3.0 TD dubbelkajuit Op die afstandmeter? Net meer as 307 000 km. Hoeveel daarvan in die veld? Ek raai omtrent 20% van al ons rywerk. Hoeveel eienaars? Ek’s die tweede een. Hoeveel het dit gekos? R187 000 in 2004, toe dit net meer as 75 000 km afgelê het. Hoekom dié Nissan? Die bakkie het byna al die veldtoerusting gehad wat ek wou hê. Het dit ’n bynaam? Daisy de Melker, want sy is rof en onbeskof! Waarheen het sy al gery? Namibië, Botswana, Zimbabwe en Swaziland, en plaaslik die Sederberge, Karoo, Kgalagadi en die Noord-Kaap. Jou droombestemming? Ek sal graag vir Daisy na die noorde van Namibië en Angola wil neem. Onklaar? Die turbo-aanjaer se pyp het een keer, doer naby…

Die man wat ons voor die klein dorpsmuseum ontmoet, is die definisie van ’n Weskusser. Die suidoostewind sit in sy gesig, die son in sy taai vel, en ek is amper seker daar is seesout in sy bloed. Ek kry die gevoel die sandale waarby sy growwe tone uitsteek is die naaste wat daai voete ooit aan skoene kom. En sy kortbroek is kórt. Ek het onderbroeke wat langer is. Ek en my kollega Gerrie van Eeden is in Port Nolloth, die beginpunt van ’n week lange roete langs die Weskus. Ons het besluit dis beter om met twee voertuie te kom (ek in die langtermyn-Amarok en Gerrie in ’n Toyota Hilux). Ook maar goed so, want soos ons later sou uitvind, is dit die wilde Weskus hierdie. Ons plan…

ECHO-4X4-MULTISOK Sommer baie krag Baie veldryers en kampeerders sal vir jou sê jy kan nóóit genoeg kragpunte in jou ryding hê nie. Daarom het die mense by Echo 4x4 hierdie slim veelproppasstuk uitgedink. Dit het ’n verskeidenheid 12V-kragsokke wat jy met ’n gewone Brad Harrison-sok aan jou ekstra battery koppel om krag te gee aan jou yskas, ligte en dies meer. Dit het ’n sigaretaanstekersok, twee Hellaen nog ’n Brad Harrison-sok. En as dié multiproppe te min is, kan jy nóg een aan hom koppel. Dis van staal gebou en het skroefgate sodat jy dit in jou bakkie se laairuim kan vasbout. Die boksie kan oopskroef sodat jy binne-in kan loer as iets fout gaan. Daar is ook ’n afsonderlike sekering in elke stroom (vir kortsluitings). PRYS: R699 KONTAK: Echo…

Dis maklik om te sê jou ryding is sterker as jou buurman s’n omdat hy meer pêre of tôhk het. Maar is hy sterker omdat hy meer kilowatts het, of beteken dit hy’s beter met ’n swaar vrag op die bak? Kom ons verduidelik. DIE UITWERKING VAN KRAG EN WRINGKRAG Die verhouding tussen krag en wringkrag kan maklik verduidelik word aan die hand van ’n resies. In die een baan het jy ’n naelloper. Hy’s die vinnige ou met baie krag. En in die ander baan het jy ’n liggaamsbouer. Hy’t weer baie wringkrag. Die naelloper lê die afstand in 10 sekondes af, terwyl die liggaamsbouer dit in 20 sekondes doen. Maar sit nou ’n groot rugsak op albei se rûe. Die liggaamsbouer sal die 100m min of meer in…

Hierdie “ongelukkie” het verlede Desember plaasgevind terwyl ek saam met ’n groep 4x4’s in ’n stuk veld in Emalahleni (Witbank) gery het. Ek was in my Land Rover Defender90 en my broer in sy Jeep Wrangler. Die omgewing het swaar reëns gekry en was baie modderig. Ek het die spore gesien en gedink ek wil dit waag. Hulle was egter baie dieper as wat ek geskat het en die modder was boonop baie dikker as wat ek gedink het. En daar val ek vas! Gelukkig het ons ’n kinetiese tou gehad en my broer en sy Jeep kon my met ’n vinnige kinetiese pluk herwin. Ter verdediging moet ek sê geen ander 4x4 kon dié spore daai dag baasraak nie!…

Daar’s seker min ouens wat nie daarvan sou hou om met ’n Ford Mustang by vanjaar se WegRy-Bull Run op te daag nie. Span Blacktang met hulle 1981 T-Top gaan heelwat aanhangers hê. Maar dié ou Ford kom ook natuurlik met ’n storie. Waar kom die Mustang vandaan? Ons het lank en hard vir ’n motor gesoek en eintlik toevallig by die eienaars van hierdie 1981 Ford Mustang T-Top uitgekom. Die vorige eienaars hou vol dat hulle baie werk aan die voertuig gedoen het, maar ons moes ook heelwat doen om hom weer op die pad te kry. Ons het die Mustang vir R15000 gekoop. Die 1981-model is nou wel nie die ikoniese Mustang waarmee Steve McQueen die wêreld aan die brand gejaag het in die fliek Bullit nie. Maar…

MERCEDES BENZ-BAKKIE ’n Merc-bakkie met Franse én Japannese bloed Mercedes-Benz mik vir die bakkiemark. Die Duitsers se moedermaatskappy, Daimler, gaan saam met die Renault-Nissan-vennootskap ’n bakkie bou wat gegrond is op die nuwe Nissan NP300. Die Nissan sal min of meer dieselfde tyd die lig sien, maar die Renault-Nissan-vennootskap is óók besig om ’n bakkie te ontwikkel vir Renault. Die bakkie sal ook komponente met die ander twee deel. So gaan hulle almal Merc-Hardbody Dusters genoem word? Nie heeltemal nie. Elke vervaardiger sal sy eie stempel afdruk en Merc sê hulle bakkie sal die spesifieke behoeftes van hulle soort kliënte bevredig. Renault se bakkie gaan egter eerste tot die mark toetree, met produksie wat in 2016 begin. Die nuwe Nissan NP300 en die Mercedes-bakkie sal eers aan die einde van…

As jy dink aan vervaardigers se grootste sportnutsvoertuie, soos die Range Rover of Mercedes GL, lyk dit nooit of hardebaard-4x4-roetes dié klas viertrekvoertuig se voorland is nie. Tog prop vervaardigers hulle so vol veldrytegnologie en -hulpmiddels dat iemand iewers die balans moet vind tussen ’n weeldevoertuig en bekwame veldryer. Dit lyk op die oog af asof die Infiniti QX80 naby aan daai balans kom, maar is hy heeltemal daar? Infini-wie? Moenie skuldig voel as jy gedink het Infiniti is ’n Steven Spielberg-ruimtefliek of ’n mediese fonds nie. Dié voertuigvervaardiger is nog nie baie lank in Suid-Afrika nie en is taamlik onbekend. Infiniti is ’n luukser afdeling van Nissan, basies wat Lexus vir Toyota is. Hulle ploeg egter nie met Nissan se kalwers nie. Infiniti se enjins en komponente is heeltemal…

Die kroeg in die Himeville Arms Hotel is in twee wêrelde verdeel: sokkerondersteuners aan die een kant en rugbykykers aan die ander. Op ’n TVskerm aan die een kant van die toonbank spook Orlando Pirates teen SuperSport United. Anderkant pak die Sharks die Chiefs. Die mense word vasgenael deur die skarrelende figure op die skerms. Afgesien van ’n handjievol locals is die vertrek gevul met 4x4-reisigers en avontuurmotorfietsryers, hulle broekspype bruin van die modder. Himeville is die begin- of eindpunt van die meeste reise na Sani-pas en tussendeur die krete in die rigting van die TV-skerms oorheers dié bekende pas die geselskap. Oorkant my sit twee jong ouens. Uit hulle gesprek kan ek aflei hulle is motorfietsryers met ’n strawwe dag agter die rug. Een is op die foon. Ek…

Jy sal nooit weer in die donker hoef rond te tas as jy Energizer® se draagbare ligte vir jou kampeer- of 4x4-vakansie inpak nie. Die ligte gebruik sogenaamde Light Fusion-tegnologie, waarmee lig van verskeie LED’s in honderde klein kolletjies, wat Light Fusion-elemente genoem word, uitgestraal word. Dit skep uitstekende lig in en om die kampterrein. Boonop is Energizer® se ligte veilig vir gebruik – dit hou geen van die gesondheids- of brandgevare van gas- of paraffienlampe in nie. baie vergemaklik op uitgebreide 4x4-toere, of selfs wanneer jy ná werk in die donker ’n pap wiel langs die pad moet omruil. Die 2-in-1-LED-staanlig is die ideale flits omdat dit ook as ’n lantern gebruik kan word terwyl jy kamp opslaan. Die lig is sterk genoeg om die stampe en stote van…

Dis nie moeilik om te sien hoekom die plaas Waterval as ’n private natuurreservaat geproklameer is nie. Dis ’n pragtige stuk grond aan die voet van die Olifantsrivierberge, slegs 4km buite Porterville, met water wat heeljaar uit die berge in ’n kloof afstroom. Die water is kristalhelder en só skoon dat jy dit sommer uit die stroom kan drink. Maar wat as jou buurman in die kampterrein twee staanplekke stroom-op met sy tone in die water sit, vra ek die eienaar, Mac Jordaan. Die Bybel, sê hy, meen as dit oor sewe klippe geloop het ... Wel, die staproete op die plaas word nie verniet 22 Watervalle genoem nie en hier is baie klippe waaroor die water kan kabbel. Maar ons is nie net hier vir die staproete of die…

Verruil die Suid-Afrikaanse winterweer vir Botswana se immergroen Okavango-delta. Hier waar die Okavangorivier in die droë Kalaharisand verdwyn, woon derduisende diere in die wintermaande. Kyk hoe olifante, buffels en sebras doodluiters wei terwyl ’n leeuwyfie of dalk ’n luiperd hulle saggies deur die lang gras probeer bekruip. Dié doolhof van diep mere en kronkelende kanale is ’n geskenkpakkie vol lewe. Vanaf Junie tot Augustus is die watervlak op sy hoogste, wat vaarte per boot en kano maklik maak. September en Oktober is die warmste maande. Dan is dit die beste tyd om al die dors diere op die rand van die delta te sien water suip. Onthou om jou kamera saam te bring, want jy gaan ’n paar onvergeetlike oomblikke vir jou skyfievertoning kan vaslê. ENKELKAMP-SAFARI DATUM: Die aanbod geld…

Jy het besluit dis tyd om ’n ordentlike VHF-radio in jou veldvoertuig te laat installeer, maar waar begin jy? Sit jy bloot een in en trek weg met jou grappies oor die luggolwe? Hokaai! Voordat jy ’n radio kan gebruik, moet jy die frekwensies waarop jy wil gesels laat laai. En om dit te doen, moet jy aan die regte deure klop. In die verlede was dit maklik, want daar was ’n affiliasie tussen die AAWDC (die vereniging van 4x4-klubs van Suider-Afrika) en Orra (Off-Road Radio Association). “Vroeër jare,” sê Tim Inman, die radiobeampte van die Land Cruiser-klub van Suid-Afrika, was al die klubs wat lede van die AAWDC was, outomaties ook lede van Orra. Dit het hulle toegang gegee tot Orra se radiofrekwensies vir veldryers. Maar volgens Johan van…

SLEUTELSYFERS Enjin: 3 198 cc vyfsilinder turbodiesel Krag: 147 kW@ 3 700 r/min Wringkrag: 470 Nm @ 1 500 – 2 750 r/min Topsnelheid: Nie verskaf nie 0-100km/h: Nie verskaf nie Transmissie: 6 gang outomatiese ratkas, deeltydse 4x4, laestrek Vering: Dubbele mikvere voor, vaste as met bladvere agter Bande: 265/60/R18 Brandstoftenk: 80 liter Brandstofverbruik: 9,3 liter/100 km Grondvryhoogte: 237 mm Naderingshoek: 25,5° Vertrekhoek: 21,8° Dompeldiepte: 800 mm Gewig: 2 118 kg Sleepvermoë: 3500kg (gerem) Diensinterval: 15 000 km Waarborg: 4 jaar/120 000 km Diensplan: 5 jaar/90 000 km Prys: R551 900 Ford blaas nou al vir ’n hele ruk in Toyota se nek wat bakkieverkope betref. Die Ranger het selfs ’n maand of wat die kroon gedra as die topverkoperbakkie. Die Wildtrak is juis daarop gemik om die luukse dubbelkajuitmark…

Die Hyundai Terra-can is die enigste Hyundai nóg wat ’n laestrekratkas gehad het. En as jy kyk hoe goed die Terracan eintlik gevaar het en hoe styf die ouens wat een ry aan hom vasklou, sal jy ook teleurgesteld wees dat die maatskappy nie met nuwe generasies van hom vorendag gekom het nie. Herkoms Die Terracan het in 2003 in Suid-Afrika aangekom. Die Terracan se onderstel is dieselfde as dié van die tweede generasie Pajero. En in baie mense se boeke is dit die taaiste Pajero wat tot dusver vervaardig is. In die vier jaar tot en met 2007 wat die Terracan op die mark was, is niks aan die voertuig verander nie. Dieselfde 3,5 liter-V6-petrolenjin en die 2,9 liter-CRDi-turbodieselenjin was beskikbaar. Al verskil in modelle was dat jy ’n…

TOETS 1 REMMING – NAT TEER Dié remtoets, gedoen volgens internasionale ISO-standaarde, meet remverrigting in nat toestande vanaf 80 tot 0 km/h op teer. Die druk vir alle bande was 2,4 bar. Ná die eerste paar toetse was dit duidelik die verskil tussen die verskillende bande se stopafstande sou gering wees, en tussen die tien het dit gewissel van 37,5 tot 42,6 meter. Die Dunlops, Hankooks en Goodyears se stopvermoë was uitstaande – minder as 2 m langer as dié van die AT-kontroleband – terwyl dit meer as 40 m gekos het om die BF’s, Kumho’s, Nankang- en Achilles-bande te rem. Tog, statisties gesproke, is daar bitter min verskil tussen die bande se stopverrigting. TOETS 2 RONDTETYD – NAT BAAN Gerotek se doelgeboude baan, met sproeiers wat voortdurend ’n lagie…

In WegRy #71 het ons gewys hoe Gerhardt Visser van Rustenburg ’n goedkoop, staande kroegyskas in ’n horisontale kampyskas omskep het. Die yskas werk egter steeds met 220V-“huiskrag” en het ’n omskakelaar op ’n batterystelsel nodig wat dié soort krag kan voorsien. Ingewikkeld? Glad nie! Gerhardt het bloot ’n batterystelsel in ’n ammo-boks gebou en met twee sonpanele op sy bakkie se kappie gekoppel. Nou bly sy biere altyd koud. Wenresep Twee diepsiklusbatterye is in ’n ammo-boks gemonteer en ’n omskakelaar, sonkrag-reguleerder en stroombaanbrekers is op die deksel vasgesit. Dit maak die stelsel draagbaar. Gerhard het ook twee Brad Harrisonproppe gebruik, een op die kis en een by die sonpanele, sodat hy die drade kan ontkoppel wanneer hy die kis wil verwyder. Die sonpanele laai die batterye deur ’n sonkrag-reguleerder.…

As jou hardehout uitgebrand het en ’n bedding glinsterende kole lê dieprooi voor jou, só warm dat die sweet pêrels op jou voorkop maak, weet jy dis die regte oomblik om die steak te braai. Maar ’n goeie gebraaide steak behels meer as net ’n vinnige draai by die hoekkafee, ’n bier en ’n braaitang. KOOP GEHALTE Voordat jy kan dink aan lekker vleis braai, moet jy lekker vleis in die hande kry. Al te dikwels word ’n stuk vakuumverpakte steak op die nippertjie op die naaste supermark se rak gegryp vir vanaand se braai. Supermarkte se vleis is nie noodwendig sleg nie, maar ’n helder pienk-rooi stuk kruisskyf wat sommer vanoggend nog net ná slagtyd verpak is, sal nie deug nie. Ek glo in ’n ordentlike slagter. Iemand wat…

or die jare het ek ’n soort lakmoestoets vir ons kampervarings ontwikkel. ’n Lekker en gesellige vakansie is iewers in die middel van hierdie skaal, op ’n gebalanseerde pH7. Aan die verste punt van die spektrum is vakansies waar die kampering nie meer as ontspanning tel nie, maar as ’n adrenaliensportsoort. Kampering by musiekfeeste is op een van die verste punte van dié skaal. Ek het lank botweg geweier om sulke feeste by te woon. Ek kon dit net nie verstaan nie.Waarom sal ’n horde mense op ’n pragtige, vreedsame plek toesak, soveel geraas as moontlik maak, en dan weer huis toe gaan? Maar my man, Larry, is ’n musikant, dus was ek al op ’n hele paar musiekfeeste. En, ek gee toe, dis lekker om tussen die berge na…